இவனது நிஜ வாழ்க்கை ...

வண்ணக் கலவைகள்  

கிண்ணத்தில் இருந்தன...

ஆடை களைந்து

மினுக்கும் ஜிகினா

உடையணியும் நேரம்

ஒரு முறை மீண்டும்

நிலைக்கண்ணாடியில்

தன்னைப்பார்த்து மீள்கையில்

ஒப்பனைக் கலைஞன்

அவனருகே .....!

திரைவிலகியதும்

முதல் காட்சியில்

தோன்றவேண்டும்.....!

வீதியெங்கும் ஆவலுடன்

அமர்ந்திருக்கும்

ரசிகர்கள்....!

ஹார்மோனியப் பெட்டியுடன்

பாட்டுவாதியார்

பக்க வாத்தியங்களுக்கு

நடுவே...!

மாதக்கணக்கில்

ஒத்திகை பார்த்து

நினைவில்கொண்ட பாடலை

உச்ச குரலில் பாடவேண்டும்  !

ஆம்.....................

அரிதாரம் பூசி கோமாளியாய்

மற்றவர்களை சிரிக்கச்செயும்

இவனது நிஜ வாழ்க்கை ...

ஒரு முகமூடிக்குள்

புதைந்திருக்கிறது !

...........கா.ந.கல்யாணசுந்தரம்.

ஹைக்கூ கவிதைகள்..... மாறுபட்ட சிந்தனைகளுடன் !

@  பூட்டிய வீட்டுக்குள்
      சலங்கை ஒலி ...
      பரதம் கற்பித்த முற்றத்துடன் !

@  நிலவொளியில் மங்கினாலும்
      நீலவானின் நண்பர்கள் ...
      விண்மீன்கள் !

@  நடைபயிலும் குழந்தைக்கு
      தெளிவாய் தெரிந்தது
      நம்பிக்கையின் இருப்பிடம் !

...........கா.ந.கல்யாணசுந்தரம் 

நெஞ்சம் நிறையும்

இல்லையென்று  சொல்லாமல் 

ஒரு மலரினைக் கொடு 

நெஞ்சம் நிறையும் 

......கா.ந.கல்யாணசுந்தரம் 

இதய நூலகம்.....

படுக்கையில் படுத்ததும் கண்ணுறங்கி
கனவுலகில் சஞ்சரிக்கும் நாட்கள் குறைந்தன !
ஏதோ ஒன்றை இழந்து மற்றொன்றை தேடும்
படலத்தில் வாழ்க்கை காய்களை நகர்த்துகிறேன்!
ஒளிவு மறைவற்ற எண்ணங்களில்
என்னை நானே ஏமாற்றப்படுகிறேன்!
தீர்க்கமாய் செய்துமுடிக்கும் திறனும்
இப்போதெல்லாம் சோம்பல் போர்வைக்குள்
முடங்கியவாறே செயலிழந்திருப்பது...
நன்றாகவே உணரப்படுகிறது!
ஆரம்பிக்கப்பட்ட வாசல் கோலங்கள்
முடிக்கப்படாமலே சிக்கலாய் முடிவதைப்போல்
முனைப்புகள் தோல்விகளின் விளிம்புகளில் !
ஆனால் ஒன்று மட்டும் தெளிவாய் தெரிகிறது...
மனதின் உறுதியை உடல் ஏற்க மறுக்கிறது!
எண்ணங்களின் விழுதுகள் அவ்வப்போது
விரல் நுனிக்குள் கவிதை வேர்களாய் வியாபித்து....
தடம் பாதிக்கும் ஆற்றலுடன் வெளிப்படுகிறது!
காகிதத் தாட்களுடன் கடைசிவரை வாழ்வதில்
இதய நூலகம் எப்போதும் காத்திருக்கிறது!

..........கா.ந.கல்யாணசுந்தரம்.